【有陣時 你真係唔知一個少少嘅幫忙有幾重要】
之前，同一位前輩講開區議員，我話區議員冇權冇責，街坊發現爆渠漏水，其實區議員都冇乜嘢可以做架喎，佢最多都係幫你ref去政府部門。
然後呢位前輩同我分享佢以前一個故事，話說佢有一次試過凌晨返屋企嘅時候，一插條鎖匙入門口、一擰條鎖匙，條鎖匙就斷咗喺個門鎖入邊，但夜麻麻有邊度去搵開鎖佬呢，喺呢個時候，樓下有個看更咁岩行過，佢求其chok兩chok度門，度門就開到喇😮（題外話，咁究竟呢個看更以前係做邊行㗎呢？又或者，究竟道門係有幾咁冇防盜功能呢？😧）
呢個故事，呢位前輩記足一世，可能對於嗰個出手相助嘅人來講，呢個幫忙何足掛齒，但作為受助者，佢永遠記得喺自己危難嘅時候，有一個人幫佢一把。
呢個故事引申出，就算區議員嘅職能幾咁冇用都好，可能對於嗰位需要幫助嘅街坊來講，喺佢最徬徨嘅時候，如果有一為區議員能夠陪住佢，就算個幫助幾細，佢都會永遠記得。
=====（分隔線）======
話說今日見到一班朋友，呢班朋友唔係成日都可以見，一年最多見到一兩次，其中有一個，一見到我就話我個樣唔識講大話，睇得出我唔多掂。
然後喺我搭車返屋企嘅途上，我收到呢幾個訊息。可能佢會覺得，唔係成日見到我、就算send個訊息嚟都安慰唔到我啲乜，不過都send下啦；但對於受嗰個來講（即係我），其實我係覺得好touched。
莫為善小而不為，希望大家見到身邊有人唔掂嘅時候，唔好因為覺得自己嘅關心好細、冇乜用，就唔去做，其實對方未必會咁諗，其實可能你會幫到佢好多。
「如果我連眼前人都關心不了，如何關心街坊？」
Search